Мамлакатимизда таълим, фан ва экология йўналишлари ўзаро узвий боғланган ҳолда ривожланмоқда. Бунинг яққол мисоли сифатида Қорақалпоқ давлат университети ҳудудида барпо этилган «Илм-маърифат боғи»ни келтириш мумкин. Ушбу лойиҳага Наманган давлат техника университети ташаббус кўрсатиб, илмий ёндашув асосида ҳаётга татбиқ этди.
Янги барпо этилган боғда 100 дан ортиқ манзарали дарахт кўчатлари ва 500 дан зиёд турли хил гуллар ўстирилди. Айниқса, бу ўсимликларнинг Наманган давлат техника университетининг инновацион иссиқхона ва лабораторияларида етиштирилгани аҳамиятлидир.
Боғ барпо этилишида замонавий гидрогел технологияси қўлланилди. Бу технология сувни тежаш, ўсимликларни самарали парваришлаш ва экологик барқарорликни таъминлашда муҳим омил бўлиб хизмат қилади.
Тантанали очилиш маросимида икки университет раҳбарияти, профессор-ўқитувчилар, талабалар ҳамда оммавий ахборот воситалари вакиллари иштирок этди. Қорақалпоқ давлат университети ректори, академик Ахмед Реймовнинг таъкидлашича, «Илм-маърифат боғи» — бу ёшлар учун нафақат эстетик маскан, балки экологик маданиятни шакллантирувчи ўқув-тарбиявий майдон ҳамдир.
Маросим давомида яна бир муҳим воқеа юз берди: Наманган давлат техника университети жамоаси Қорақалпоқ давлат университетига 64-халқаро гуллар фестивалида иштирок этиш учун расмий таклифнома топширди. Бу таклиф икки олий таълим муассасаси ўртасидаги ҳамкорликни янада мустаҳкамлаб, янги илмий-амалий босқичга кўтаради.
Шубҳасиз, «Илм-маърифат боғи» каби ташаббуслар таълим ва фан ютуқларининг ҳаётга татбиқ этилиши, ёш авлод онгида атроф-муҳитга меҳр ва масъулият ҳиссини шакллантиришда катта аҳамиятга эга.