Минтақамизда яна бир унутилмас тарихий воқелик рўй берди. Ўзбекистон, Тожикистон ва Қирғиз Республикаси ўртасида давлат чегараларининг туташ нуқтаси тўғрисидаги шартноманинг имзоланиши халқларимиз учун юксак аҳамият касб этади. Бу нафақат чегараларни аниқ белгилаш, балки қардошлик, ҳамжиҳатлик ва ўзаро ҳурмат тимсоли сифатида ҳам тарихга муҳрланди.
2025 йил 31 март куни қадимий Хўжанд шаҳрида дўстона учрашув бўлиб ўтди. Ўзбекистон Республикаси Президенти Шавкат Мирзиёев, Тожикистон Республикаси Президенти Эмомали Раҳмон ва Қирғиз Республикаси Президенти Садир Жапаров уч томонлама музокаралар ўтказиб, халқлар манфаатини кўзлаган муҳим қарорлар қабул қилдилар. Учрашув якунида давлат чегараларининг туташ нуқтаси тўғрисидаги тарихий шартнома имзоланди ва уч давлат раҳбарларининг Қўшма декларацияси эълон қилинди. Бу битим – барқарорлик ва тараққиёт йўлида ташланган муҳим қадамдир.
Шунингдек, уч давлат чегаралари туташган ҳудудда «Дўстлик» стеласи тантанали равишда очилди. Бу ёдгорлик асрлар давомида ёнма-ён яшаб келаётган халқларимиз ўртасидаги мустаҳкам ришталарнинг рамзига айланди. У умумий тарихи ва келажаги муштарак бўлган қардош миллатларни янада яқинлаштириш, ўзаро ишонч ва биродарлик руҳини мустаҳкамлашга хизмат қилади.
Президентимиз Шавкат Мирзиёев ўз нутқида бу шартнома ва дўстона келишувларнинг аҳамиятини таъкидлаб, қўшни Тожикистон Республикаси ва Қирғиз Республикаси халқларини ушбу муҳим воқеа билан самимий табриклади. Чегараларни делимитация қилиш масаласи узил-кесил ҳал этилгани нафақат сиёсий барқарорлик, балки иқтисодий ва маданий алоқаларни мустаҳкамлашга ҳам кенг йўл очади.
Биз, илмий доира вакиллари, бу тарихий жараённи юксак баҳолаймиз. Чегараларни аниқлаштириш – тинчлик ва фаровонлик кафолати. Бу ҳужжат минтақада инвестициявий жозибадорликни ошириш, инфратузилмавий лойиҳаларни амалга ошириш, транспорт йўналишларини такомиллаштириш ҳамда таълим ва илмий тадқиқотлар борасидаги ҳамкорликни янги босқичга олиб чиқиш имконини беради.
Бугунги Янги Ўзбекистон – дўстликка, ҳамкорликка ва тараққиётга интилган мамлакат. Очиқлик сиёсати нафақат миллий тараққиётга, балки қўшни давлатлар билан ҳам ишончли шерикликни мустаҳкамлашга хизмат қилмоқда. Бизнинг қалбимизда янги ишонч ва биродарлик уйғотган ушбу тарихий шартнома келажак авлодлар учун тинчлик, ҳамжиҳатлик ва тараққиёт сари янги йўлларни очишига шубҳамиз йўқ.
Ойбек ЭРГАШЕВ,Наманган муҳандислик-технология
институти ректори в.в.б, профессор.