Ҳомиладорлик - нафақат она, балки дунёга келаётган гўдакнинг оила аъзолари учун ҳам ҳаяжонли жараён. Мамлакатимизда чақалоқ ҳали она қорнидалигидаёқ унинг саломатлиги учун қайғурилади. Ҳомиланинг соғлом ривожланаётганини билиш учун эса ҳомиладорликнинг илк даврларида мутахассислар томонидан бир қатор тиббий кўрик ва текширувлар амалга оширилади. Чунки ҳомиладорлик даврида аниқланган муаммолар онанинг ҳам, боланинг ҳам соғлиғини ҳимоя қилиш учун ўз вақтида аралашувга имкон беради.
РИО ва БСИАТМДМ Наманган филиали томонидан айни шу мақсадда жорий йилнинг феврал ойида «Соғлом ҳомиладорлик – соғлом келажак» акцияси ўтказилди.
Акция доирасида филиал директори Райхона Даминова, директор муовини Дилноза Тиллабаева, тиббиёт фанлари номзодлари Тошпўлат Абдукаримов, Лолахон Абдуллаева Иродахон Муҳитдиновалар томонидан тиббий кўрик ва мутахассис текширувлари ташкил этилди. Шунингдек, тиббий кўрик ва текширувларга филиалнинг 48 нафар акушер-гинекологлари, 3 нафар УТТ мутахассислари ҳам жалб этилди.
Тиббий кўрикдан ҳомиладорликка мутлақ ва нисбий монеълиги бўлган хавф гуруҳидаги 1010 нафар ҳомиладор аёл ўтказилган бўлса, олинган хулосалар уларнинг 193 нафарини стационар шароитда даволаниши зарурлигини кўрсатди. Шу мақсадда РИО ва БСИАТМДМ Наманган филиалига 14 нафар, яшаш жойларидаги туғуруқхоналарнинг ҳомиладорларни даволаш бўлимларига 91 нафар бўлажак оналар йўлланма асосида юборилди.
817 нафар ҳомиладорлар эса амбулатор шароитда даволанишга тавсия этилди. Ўз навбатида, Республика Перинатал марказига 14 нафар ҳомиладор аёл, РИО ва БСИАТМга 2 нафар аёл имтиёзли ордер билан малакали мутахассислар кўригидан ўтиш ва даволаниш учун юборилди.
Юқорида таъкидлаганимиздек, акция доирасидаги тиббий кўрикка асосан ҳомиладорликка мутлақ ва нисбий монеълиги бўлган хавф гуруҳидаги ҳомиладорлар қамраб олинди. Мутлақ туғишга қарши кўрсатма мавжуд бўлган 17 нафар аёлнинг ҳомиладорлиги тўхтатилди ва шу йўл билан уларнинг ҳаёти сақлаб қолинди.
Хўш, тиббий текширув ва таҳлиллар натижасида ҳомиладорларда айнан қандай касалликлар кузатилди? Ёки бошқача айтганда, нега 1010 нафар аёл хавф гуруҳига киритилган эди?
Маълумки, бир қатор назологиялар бўйича таҳлиллар ўтказилганда, ҳомиладорларнинг 36 нафарининг СЙИ сурункали пиелонефрит, 7 нафарининг СЙИ уретрогидронефроз касаллигининг 2-3 даражаси, 14 нафарининг ягона бўйрак пиелонефрити, 9 нафарининг эпилепсия, 10 нафарининг юрак-қон томир касалликлари (ЮТН), 8 нафарининг СЮРК МКЕ, 1 нафарининг туғма катаракта, 4 нафарининг жигар циррози билан оғриганлиги аниқланган.
Шунингдек, 13 нафар ҳомиладорда миома, 36 нафар оғироёқ аёлда варикоз касаллигининг 2-3 даражаси, 2 нафар ҳомиладорда тромбофлибит, кросэктомиядан кейинги ҳолат, 24 нафар бўлажак онада сурункали гепатит С ва сурункали гепатит В, 1 нафар аёлда остеомиелит, 7 нафар ҳомиладорда оғир преэклампсия, 4 нафарида бронхопневмония, 8 нафарида қандли диабет, 5 нафар аёлда сурункали бронхит, 19 нафар ҳомиладорда эса сурункали гипертензия белгилари кузатилган.
10 та ҳолатда эса кўп ҳомилалик, 17 та ҳолатда уч ва тўрт бора чандиқли бачадон, 1 та ҳолатда системали “қизил бўрича” аниқланган. 7 нафар ҳомиладор аёл семизликнинг 2-3 даражаси билан, 1 нафар аёл ўпка туберкулёзи, яна бир нафар аёл лимфоангиома касаллиги билан фарзанд дунёга келтириши маълум бўлган.
Ҳомиладорларнинг 9 нафарида кўп сувлилик, 1 нафарида қорин парда орти ўсмаси нефроэктомиясидан кейинги ҳолат, ОИВ инфекцияси, 3 нафарида ўт қопи касалликлари, 2 нафарида церебрал фалажлик, 3 нафарида олигофрения касаллиги мавжудлиги сабаб зарур даво чоралари кўрилди.
5 нафар ҳомиладор аёл бел умуртқа грижаси, 22 нафар ҳомиладор камқонликнинг оғир даражаси, 918 нафар ҳомиладор аёл камқонликнинг ўртача оғир даражаси ва 2 нафар ҳомиладор ўткир ёғли жигар гепатози билан курашаётган бўлса, 6 та ҳолатда қуйи плацентация, 5 та ҳолатда плацентанинг олдинда келиши аниқланган. 3 нафар бўлажак оналар фарзандларини ЭКУ йўли билан дунёга келтириш арафасида.
Кўриниб турибдики, «Соғлом ҳомиладорлик – соғлом келажак» акцияси мингдан зиёд бўлажак оналар ва уларнинг гўдаклари саломатлиги учун алоҳида аҳамият касб этди. Аниқланган барча ҳолатлар бўйича, албатта, даво чоралари кўрилмоқда. Мақсадимиз – ҳар бир она-боланинг соғлом ҳаёт кечиришига эришиш. Бу йўлда барча куч, билим, тажриба ва салоҳиятимизни ишга солмоқдамиз.
Лола АБДУЛЛАЕВА,
РИО ва БСИАТМДМ Наманган филиали бўлим бошлиғи,
тиббиёт фанлари номзоди.
