Янги Наманган туманида тикилган кашталар АҚШ, Туркия, МДҲ, Европа мамлакатларини ўзига ром этмоқда.
Туманнинг “Мингчинор” маҳалласида яшовчи Хакимжон Тожибоев ипак матоларини бўяш ва тўқиш касби билан шуғуллунади, у бу ҳунарнинг 3-авлоди саналади. Шу кунга қадар 5 мингдан зиёд шогирдлар етиштирган, ҳозирда 200 нафарга яқин хотин-қизларга кашта тикишни ўргатиб, касаначилик асосида уйда ўтирган ҳолда иш билан банд этган.
“Бу ҳунар кўпроқ воҳада оммалашган, ўзим 25 йилдан ошди, каштачиликни ривожлантириб, изланиб, Наманганда ҳам оммалашишига ҳаракат қиляпман. Нуронта, Самарқанд, Бухоро нусқалар орасида Наманганча услубниям ўз ўрнига эга бўлиши учун янгича дизайнлар яратяпмиз”, — дейди ҳунарманд.
Қўл меҳнати асосида кўз нури, қалб қўри билан яратилган бежирим ишлар нафақат мамлакат бўйлаб, балки Россия, Украина, АҚШ, Туркия ва Европа давлатларида ҳам ҳаридорларни ўзига мафтун этмоқда. Бу ерда 300 минг сўмдан тортиб, 130 млн сўмгача бўлган маҳсулотларни учратиш мумкин, уларнинг баъзиларини тикиш учун 2-3 йиллаб вақт сарфланар экан.
“Шу ҳунар ортидан уй-жой қилдим, машина олдим, фарзанд ва набираларим 4-5 авлод сифатида касбимни давом эттирмоқда. Қолаверса, кўплаб кўргазмаларда қатнашиб, ютуқларга эришдим. Юрт кездим, Белгия, Фиранция, Италия, Туркия каби давлатларда халқаро кўргазмаларда қатнашдим”, — дейди ҳунарманд фахр билан.
Қаҳрамонимиз келгусида туристларни ўзига жалб этадиган ҳунармандлар маркази ташкиллаш ниятида, бу маҳсулотни янада оммалашишига ҳамда экспорт салоҳиятини оширишга хизмат қилади. Шу билан бир қаторда марказда аёлларга кашта тикиш сирлари ҳам ўргатилади.
Янги Наманган тумани ҳокимлиги ахборот хизмати
