Наманганда Учқўрғон ва Норин туманларини вилоят маркази билан боғловчи янги йўл қурилиши лойиҳаси тасдиқланган. 17,5 километр узунликда барпо этиладиган мазкур трасса ҳозирга қадар хизматда бўлган эски автомобиль йўлида вужудга келган тирбандликларни бартараф этиш баробарида атроф ҳудуддаги аҳоли пунктларини янада ободонлаштириш ҳамда йўл ёқаси инфратузилмасини ривожлантириш имконини беради. Куни кеча бўлажак трассанинг Норин дарёси Уйчи туманидан кесиб ўтадиган қисмида қурилиши мўлжалланган кўприкка тамал тоши қўйилди.
— Лойиҳа қиймати 184,9 миллиард сўмга тенг 481 метр узунликдаги янги кўприк Республика йўл қурилиш дирекцияси буюртмачилигида бош пудратчи — “Тошкент кўприклардан фойдаланиш” давлат унитар корхонаси томонидан бунёд этилмоқда, — дейди Уйчи тумани ҳокимининг биринчи ўринбосари Фарҳод Мамадалиев. — Кўприксозлар айни пайтда қурилишолди тайёргарлик ишларини ниҳоясига етказиб, асосий юмушларга киришишди.
Наманган вилояти автомобиль йўллари ривожига хизмат қиладиган янги кўприкни 2025 йилнинг учинчи чорагида тўла битказиш кўзда тутилган.
