«Иссиқлик электр станциялари» акциядорлик жамияти тизимидаги Тўрақўрғон иссиқлик электр станциясида электр энергияси ишлаб чиқариш бўйича 2023 йил учун белгиланган прогноз кўрсаткичлари муддатидан илгари бажарилишига эришилган эди.
Йил якуни бўйича амалга оширилган дастлабки ҳисоб-китобларга кўра, корхона томонидан электр энергияси ишлаб чиқариш бўйича йиллик режа ортиғи билан 103,9 фоизга бажарилиб, режага нисбатан 256,1 млн. кW-h қўшимча электр энергияси ишлаб чиқарилди.
2023 йил давомида корхона томонидан ишлаб чиқаришда фойдаланиладиган шартли ёқилғининг солиштирма сарфи бўйича белгиланган кўрсаткични 4,65 граммга камайтиришга (прогнозга нисбатан 102,1 фоиз), ва бунинг натижасида салмоқли миқдорда табиий газ ресурслари тежалишига эришилди
— Бу кўрсаткичларга, аввалом бор, корхона меҳнат жамоаси ҳар бир аъзосининг меҳнати, шунингдек, ишлаб чиқариш жараёни барқарорлигини ҳамда асосий ва ёрдамчи энергоқурилмаларнинг ишончли ишлашини таъминлашга қаратилган техник-технологик чораларнинг изчил амалга оширилиши натижасида эришдик, — дейди Тўрақўрғон иссиқлик электр станцияси ишлаб чиқариш-техника бўлими бошлиғи Мубошер Хамраев.
Маълумот ўрнида, ўрнатилган қуввати 900 МВт тенг бўлган иккита энергоблокларга эга бўлган Тўрақўрғон ИЭС корхонасида ҳозирги қиш кунларида суткасига ўртача 20,0 млн. кW-h ортиқ электр энергияси ишлаб чиқарилмоқда ҳамда мамлакатимизнинг Ягона энергетика тизимига узатилмоқда.
