CNN Травел сайти Ўзбекистонни бутун дунё сайёҳларига ташриф буюриш учун энг яхши давлатлар рўйхатига киритилгани ҳақида маълумот ОАВ сайтида эълон қилинди.
Мақола муаллифига кўра, Ипак йўли ва унда Ўзбекистоннинг аҳамиятини яхшироқ тушуниш учун Самарқанд, Бухоро ва Хивага ташриф буюриш керак.
Шунингдек, мақолада UNWTO томонидан 2023 йилда «Энг яхши туристик қишлоқлар» рўйхатига киритилган Ўзбекистоннинг Сентоб қишлоғи сайёҳларда қизиқиш уйғотиши мумкинлиги айтилади. У табиат, органик озиқ-овқат ва эко-тоғ туризмига эътибор қаратган ҳолда барқарор ривожланишга содиқлиги учун эътироф этилди.
«86 давлат фуқароларига визасиз киришни таъминлаган Ўзбекистон ташриф буюрувчиларни ўзининг чиройли ландшафтлари ва яхши сақланган меъморчилиги билан қойил қолдиришга тайёр», — дейилади мақолада.
Ташриф учун энг яхши давлатлар рўйхатига Сингапур, Испания, Индонезия, Ангола, Корея ва бошқа бир қатор давлатлар киритилди.
Қайд этиш жоизки, Ўзбекистон Марказий Осиёдан ушбу рўйхатга киритилган ягона давлатдир.
