Муборак Рамазон ойида юртимизда инсон қадрини улуғлаш, эҳтиёжмандларга амалий ёрдам кўрсатиш эзгу анъанага айланган. Айниқса, Ўзбекистон Республикаси Президентининг “Муборак Рамазон ойида эҳтиёжманд аҳолини давлат томонидан ижтимоий қўллаб-қувватлаш чоралари тўғрисида”ги қарори ижроси жойларда аниқ натижалар бермоқда.
Наманган вилоятида мазкур ҳужжат ижросини таъминлаш мақсадида тизимли ишлар амалга оширилмоқда. Энг муҳими, бу ишлар расмий тадбир ёки ҳисобот билан чекланиб қолмаяпти, балки аниқ инсонлар тақдирида ўз ифодасини топмоқда. Ижтимоий реестрга киритилган оилалар аъзоларини даволаш, уларга юқори малакали тиббий хизмат кўрсатиш, зарур ҳолатларда мураккаб жарроҳлик амалиётларини ўтказиш ишлари изчил йўлга қўйилган. Тиббиёт муассасалари мутахассислари томонидан беморлар чуқур тиббий кўрикдан ўтказилиб, даволаш режалари ишлаб чиқилмоқда.
Маълумотларга кўра, жорий йилда 264 нафар бемор «Вақф» хайрия жамоат фонди маблағлари ҳисобидан, 133 нафар фуқаро эса Давлат тиббий суғурта жамғармаси маблағлари орқали соғломлаштирилади. Ушбу кўрсаткичлар Рамазон ойида аҳолини ижтимоий қўллаб-қувватлаш борасида амалга оширилаётган ишлар кўламини яққол намоён этади.
Жумладан, Наманган шаҳрининг Далатобод ва Янги Наманган туманларида бир гуруҳ фуқароларга даволаниш ҳамда юқори технологик жарроҳлик амалиётларини ўтказиш ҳуқуқини берувчи ваучерлар топширилди. Бу ҳужжатлар оғир хасталикдан азият чекаётган юртдошларимиз учун нафақат тиббий ёрдам, балки янги умид эшигини очмоқда.
Мутахассисларнинг таъкидлашича, мазкур дастур доирасида беморлар учун барча зарур шароитлар яратилган. Жарроҳлик амалиётлари замонавий тиббий ускуналар билан жиҳозланган муассасаларда ўтказилади. Даволаш жараёни устидан доимий назорат ўрнатилган. Эътиборлиси, бундай амалий ёрдам фақат бир ҳудуд мисоли эмас, балки мамлакатимиз бўйлаб ижтимоий ҳимоя тизими мустаҳкамланаётганининг далилидир. Президент қарори ижроси орқали эҳтиёжманд аҳоли қатламини қўллаб-қувватлаш, уларнинг саломатлигини тиклаш ва ҳаёт сифатини яхшилашга қаратилган ишлар янада кенгаймоқда.
Рамазон ойида амалга оширилаётган бундай хайрли ташаббуслар юртимизда меҳр-оқибат, бағрикенглик ва инсонпарварлик тамойиллари устувор эканини яна бир бор тасдиқлайди. Энг муҳими, бу эзгу ишлар орқали юзлаб оилаларга умид ва ишонч бағишланмоқда.