4-5 ферваль куни Малайзиянинг Перак штатида «Барқарор ривожланиш мақсадларига эришишда олий таълим соҳасидаги имкониятлар ва ташаббуслар» мавзусидаги Биринчи Ўзбекистон-Малайзия таълим форуми бўлиб ўтди. Форумда ҳар икки давлатнинг олий таълим вазирлари ҳамда икки давлатнинг 50 дан зиёд етакчи олий таълим муассасалари ректорлари иштирок этди.
Форум икки мамлакат ўртасида олий таълим соҳасида мақсадли ҳамкорликнинг йўлга қўйилиши, алоқаларни янада кенгайтириш, академик мобиллик дастурларини ривожлантириш, қўшма таълим дастурларини жорий этиш ҳамда илмий тадқиқотлар кўламини оширишда мустаҳкам замин яратди.
Форум давомида соҳа мутахассислари томонидан турли мавзуларда маърузалар ўқилди ва бу жараёнда талабалар ва профессор-ўқитувчилар алмашинувини йўлга қўйиш, қўшма таълим дастурларини амалга ошириш ва илмий ҳамкорликни кучайтиришга қаратилган қатор ташаббуслар муҳокама қилинди.
Форум доирасида икки мамлакат олий таълим муассасалари ўртасида 50 дан ортиқ шартнома ва меморандумлар имзоланди.
Жумладан, Наманган давлат университети ҳам Малайзиядаги бир неча етакчи олий таълим муассасалари билан ҳамкорлик келишувларига эришди. Улардан бири — Malaya университети бўлиб, университет ректори Собитхон Турғунов бошчилигидаги делегация аъзолари Malaya университетида табиий фанларнинг ўқитилиши, хусусан, ботаника боғи ва лаборатория марказлари фаолияти билан яқиндан танишдилар. Факультетлар фаолиятидаги замонавий ёндашувларга алоҳида эътибор қаратдилар.
Malaya университетида 50 дан ортиқ илмий-тадқиқот марказлари, 4 та тадқиқот кластери, 9 та ИСО сертификатига эга лабораториялар, дунёдаги 5-рақамли клиник тадқиқот марказларининг мавжудлиги, университет Илғор тадқиқотлар институти (ИАС), Осиё-Европа институти, Халқаро давлат сиёсати ва бошқарув институти (ИНПУМА) ва Хитой фанлари институтлари билан ҳамкорликни йўлга қўйганлиги вакилларимиз эътиборини тортди.
Ташриф доирасида ҳар икки университет ўртасида манфаатли шартномалар имзоланди. Унга асосан, Malaya университетининг Sciyence (фан) факультети ҳамда Наманган давлат университетининг физика-математика факультети ўртасида профессор-ўқитувчилар ва талабалар алмашинуви йўлга қўйилади, физика-математика фанлари соҳасида қўшма лабораториялар ташкил этилади, ҳамкорликда маҳаллий ва халқаро грантлар танловларида қўшма лойиҳалар шакллантирилади ҳамда илмий тадқиқот натижалари асосида нуфузли халқаро журналларда илмий мақолалар нашр этилади ва кенг кўламли лойиҳалар тижоратлаштирилади.
Шунингдек, форум доирасида Наманган давлат университети ҳамда Утара университети ректорларининг учрашуви ҳам бўлиб ўтди. Самимий ва дўстона мулоқот давомида университетлар ўртасида тадбиркорлик марказини ташкил этиш ҳамда иқтисодиёт ва бизнес соҳасида ҳамкорлик алоқаларини йўлга қўйишга келишиб олинди. Бу бўйича келишув шартномалари имзоланди.
Аҳамиятлиси, Наманган давлат университети ва Малайзия халқаро Ислом университети ўртасида тиббиёт йўналишида стоматология, даволаш иши ва педиатрия йўналишларида қўшма таълим дастурлари асосида малакали кадрлар тайёрлаш бўйича ҳам келишувларга эришилди.
Шу ўринда Султон Идрис таълим университети билан ҳам ҳамкорлик алоқаларининг йўлга қўйилганини ҳам алоҳида таъкидлаб ўтишимиз лозим. Бир қатор йўналиш ва мақсадларни ўзида қамраб олган келишувларга мувофиқ, келгусида Султон Идрис таълим университети билан ҳамкорликда Наманган давлат университетида психология, амалий психология, инклюзив таълим ҳамда таълим жараёнларини ташкил этиш ва бошқариш каби таълим йўналишларида қўшма таълим дастурлари асосида талабалар қабули ташкил этилади ва талабалар алмашинуви йўлга қўйилади. Шунингдек, ушбу соҳаларда мутахассислик ва ихтисосликлар бўйича ҳамкорликда кадрлар тайёрлаш ҳамда илмий тадқиқотлар олиб бориш ишлари амалга оширилиши юзасидан дастлабки келишувларга эришилди.
Қолаверса, Наманган давлат университети Малайзиянинг Перлис университети билан ҳам ҳамкорлик шартномасини имзолади. Унга асосан, келгусида Наманган давлат университети мазкур Перлис университети билан ахборот технологиялари ва иқтисодиёт соҳасида ҳамкорлик қилиб, мазкур йўналишда истиқболли лойиҳаларни ҳамда профессорлар ва талабалар алмашинувини амалга оширади.
Гувоҳи бўлганингиздек, давлатимиз раҳбари ташрифи доирасида ташкил этилган «Барқарор ривожланиш мақсадларига эришишда олий таълим соҳасидаги имкониятлар ва ташаббуслар» мавзусидаги Биринчи Ўзбекистон-Малайзия таълим форуми ҳар икки давлат учун манфаатли алоқаларни йўлга қўйиш учун пойдевор вазифасини ўтади.
Айнан Наманган давлат университетининг форумдаги иштироки ва қатор олий таълим ташкилотлари билан келишувларга эришаётгани эса университетнинг халқаро ҳамкорлик фаолиятида янги саҳифани очиш баробарида, янги йўналишларда таълим қамрови ва сифатининг ошишига, илмий ва академик ҳамкорликка мустаҳкам замин яратади.