Уйчи туманидаги «Эргашбой ота» фермер хўжалиги дала майдонида илғор тажриба бошланди. Бу йилда туманда 2047 гектар майдонда Хитой технологияси асосида чигит экилиши режалаштирилган.
Мазкур технологиянинг афзаллиги шундаки, чигит экиш, плёнка тўшаш ва томчилатиб суғориш учун шланг ётқизиш ишлари бир вақтнинг ўзида замонавий техника ёрдамида амалга оширилади. Натижада вақт ва маблағ тежаш имконияти яратилади.
Мутахассисларнинг таъкидлашича, бундай усулда экилган чигит атиги 5-6 кун ичида униб чиқади. Бу эса анъанавий усулдан тахминан беш кун тезроқ дегани. Энг муҳими, ҳосилдорлик 50 центнердан ортади.
Бу тажриба фермерлар учун янги имкониятлар эшигини очиб, қишлоқ хўжалигидаги самарадорликни ошириши кутилмоқда.