Яқин вақт ичида иқтидорли ва ихтирочи талабалар бир неча йўналишлар бўйича «Мирзо Улуғбек ворислари» Республика танловининг дастлабки босқичларида ўз билимларини синовдан ўтказди. Танловнинг шаҳар ва туман босқичлари якунланди.
Мазкур танловда Наманган давлат университетининг 124 нафар иқтидорли талабаси инновацион ғоялари билан иштирок этди. Талабаларнинг фаоллиги шуни кўрсатдики, университетнинг 40 нафар талабаси шаҳар ва туман босқичларида ғолиб бўлди ва вилоят босқичида иштирок этиш ҳуқуқини қўлга киритди. Ўз навбатида, бу иқтидорли талабалар умумий ҳисобда 74 миллион сўм миқдоридаги пул мукофотини ҳам қўлга киритдилар.
Бундай юксак натижа нафақат вилоят, балки водий миқёсидаги олий таълим муассасалари эришган натижаларда ҳам қайд этилмагани Наманган давлат университетида иқтидорли талабалар билан ишлаш тизимининг оқилона йўлга қўйилганлигидан далолат беради, албатта. Аниқроқ айтганда, Наманган давлат университети талабалари вилоятдаги олий таълим муассасалари орасида вилоят босқичига энг кўп йўлланмани олди.
Таъкидлаш ўринлики, «Мирзо Улуғбек ворислари» Республика танлови илмий-инновацион лойиҳалар ва ғояларга асосланган танлов сифатида талаба-ёшлар ҳаётида тобора муҳим ўрин тутмоқда. Бошқача айтганда, бу жараёнда иқтидорли ёшларнинг салоҳияти тўлақонли юзага чиқмоқда.
Қувонарлиси, танловдаги иштирок ва натижаларга кўра, бу йил Наманган давлат университети ўтган йилга нисбатан 62 фоиз кўп натижага эришди. Бу эса, юқорида таъкидлаганимиздек, университетнинг илмий салоҳияти ортиб бораётганидан, талабаларнинг илм-фан ва инновацияга бўлган қизиқиши юқори эканидан далолат беради. Ушбу натижа Республика ОТМлари орасида ҳам энг юқори кўрсаткичлардан бири сифатида қайд этилди.
Наманган давлат университети иқтидорли талабаларни ҳар томонлама қўллаб-қувватлаш, уларнинг илмий изланишларига имконият яратиш борасида мунтазам равишда саъй-ҳаракатларни давом эттирмоқда. Ушбу муваффақиятлар ёш олимлар ва тадқиқотчилар учун катта мотивация бўлиб хизмат қилади ҳамда университетнинг илмий-инновацион ютуқларини янада мустаҳкамлашга туртки беради.
Биз университет талабаларининг вилоят ва республика босқичларида ҳам юқори натижаларга эришишларига ишонамиз. Уларнинг илм-фан йўналишидаги бу ҳаракатлари мамлакат тараққиётига муносиб ҳисса қўшиши, шубҳасиз!
Наманган давлат университети
«Пресс клуб»