Сўнгги йилларда мамлакатимизда маънавий ҳаётни юксалтириш, аждодлар меросини эъзозлаш борасида улкан ишлар амалга оширилмоқда. Юртимизнинг қадимий диёрларида жойлашган зиёрат масканлари, алломалар мақбаралари, тарихий масжид ва мадраса мажмуалари қайта тикланиб, янгича қиёфа касб этмоқда.
Ана шундай бунёдкорлик тимсолларидан бири — Самарқанд шаҳридаги Имом Бухорий мажмуасидир. Бу маскан бугун нафақат зиёратгоҳ, балки илм ва маърифат, иймон ва эзгулик ўчоғига айланди.
Бу юртнинг ҳар бир ғиштида тарих нафаси, ҳар бир тупроғида иймон нури бор. Ўзбекистон қадимдан буюк алломалар, тафаккур соҳиблари, дунё илм ва маданиятига ўз номини олтин ҳарфлар билан ёзиб қолдирган улуғ зотлар юрти бўлиб келган.
Бугун ана шу аждодлар меросини қадрлаш, уларнинг илмий, маънавий йўлини давом эттириш давлат сиёсати даражасига кўтарилган. Сўнгги йилларда юртимизда маънавият ва диний қадриятларга бўлган эътибор янги босқичга чиқди. Республикамизнинг барча ҳудудларида муқаддас қадамжолар, алломалар мақбаралари, тарихий масжид ва зиёратгоҳлар қайта таъмирланиб, кўплари янгидан бунёд этилди.
Шу улуғ ишларга ёрқин мисол — Имом Бухорий мажмуасининг янгидан қурилиши бўлди, десак асло муболаға бўлмайди. Бу бунёдкорлик нафақат меъморий, балки маънавий янгиланиш рамзига айланди. Энди бу муқаддас маскан бутун ислом олами учун фахрли зиёратгоҳлардан биридир.
Мажмуа ҳудуди 44 гектарга кенгайтирилди. Унда мўътабар мақбара, 10 минг кишилик масжид, маъмурият бинолари, музей, кириш ва чиқиш айвонлари қад ростлади. Зиёратгоҳнинг тўрт бурчагида 75 метрлик баланд миноралар осмонга қараб қад кўтарди. Улар Имом Бухорийнинг бебаҳо меросидек абадий ва маҳобатли.
Бу маскан эндиликда нафақат зиёратгоҳ, балки илм ва маърифат, тарбия ва ибрат ўчоғидир. Инновацион музейда «Муҳаддислар султони» дея эътироф этилган Имом Бухорийнинг ҳаёти, ҳадис илмидаги беқиёс изланишлари, ислом маърифати ривожига қўшган ҳиссаси ўз ифодасини топган. Унда Қуръони каримда зикр қилинган 25 пайғамбар тарихи, Расулуллоҳ алайҳиссаломнинг муборак ҳаёти, ҳадисларнинг жамланиш ва ёзилиш жараёни ҳақида бой маълумотлар жой олган.
Бу юрт — илм билан улуғ, маънавият билан гўзал. Бу заминдан етишиб чиққан алломалар — Имом Мотуридий, Бурҳониддин Марғиноний, Баҳоуддин Нақшбанд, Аҳмад ал-Фарғоний, Ал-Хоразмий, Абу Али ибн Сино, Мирзо Улуғбек ва яна юзлаб зотлар инсоният тафаккурига нур олиб кирган. Бугун Имом Бухорий мажмуаси ана шу буюк занжирнинг мангу давомидир. Бошқача айтганда, эндиликда бу маскан — ўтмиш билан келажакни боғлайдиган маънавият кўприги вазифасини ўтайди.
Мажмуа атрофида кенг кўламли ободонлаштириш ишлари амалга оширилди. Дарахтлар, гуллар, яшил майдонлар бу жойга ҳаёт нафаси, тинчлик ва осойишталик бахш этмоқда. Замонавий қулайликларга эга меҳмонхоналар, оилавий уйлар ва хизмат кўрсатиш мажмуалари зиёратчиларга қулай шароит яратмоқда.
Имом Бухорий мажмуаси бугун — халқимизнинг маънавий уйғонишининг, аждодларга эҳтиром ва эътиқодга садоқатининг ёрқин ифодасидир. Бу юрт қадимдан илм ва иймон билан йўғрилган диёр. Давлатимиз раҳбари таъкидлаганидек, “Бу мажмуа буюк маънавий устун бўлиши керак”!
Санжарбек ҲАМИДОВ.