Айни кунларда Наманган давлат университетида талаба-ёшлар ўртасида спортнинг барча турлари бўйича «Ректор кубоги» мусобақалари ўтказилмоқда.
Бугун волейбол бўйича мусобақаларга старт берилди. Ўйинларда университетнинг барча факультетларидан ҳаваскор волейболчилар иштирок этишмоқда.
Мусобақанинг очилиш маросимида Наманган давлат университети ректори Собитхон Турғунов ҳамда Вилоят волейбол федерацияси раҳбари, Вилоят ички ишлар бошқармаси бошлиғи Шуҳрат Алиев иштирок этди.
Тантанали маросимда сўзга чиққан университет ректори мамлакатимизда ёшларнинг ҳар томонлама билимли, шу билан бирга соғлом вояга етишлари учун тизимли ишлар амалга оширилаётгани, бунинг натижасида спортнинг кўплаб турларида ёшлар катта ғалабаларга эришаётгани, айниқса, сўнгги йилларда университет талабалари орасидан жаҳон ва Осиё чемпионлари етишиб чиқаётганини алоҳида таъкидлади. «Ўтган йили волейбол бўйича университетнинг талаба қизлари жамоаси икки карра Ўзбекистон кубогида биринчи ўринни қўлга киритиб, кубокнинг абадий эгасига айланганлиги эътироф этишга арзигулик ютуқдир», деди Собитхон Турғунов фахр билан.
Тантанада сўз олган Шуҳрат Алиев ҳам мамлакатимизда спортнинг волейбол тури кенг оммалашаётгани, ўзбекистонлик спортчилар жаҳон миқёсида юқори ўринларни эгаллаётгани, жумладан, Марказий Осиё давлатлари орасида рейтинг кўрсаткичлари бўйича Ўзбекистон волейболчилари биринчи ўринни эгаллаб турганини, Наманган давлат университети талаба-ёшларининг бу борадаги муваффақияти эса вилоятда волейбол мактабининг шаклланишида катта ўрин тутишини айтиб ўтди.
Шундан сўнг мусобақаларга старт берилди. Қизғин баҳсларга бой ўтган мусобақа нафақат талабаларга, балки бутун жамоага кўтаринки руҳ ва аъло кайфият бахш этди.
Айниқса, ректорат жамоаси ва факультет деканларидан иборат жамоанинг майдонда куч синаши мусобақанинг энг завқли қисми бўлди. Ўйинларни барча катта ҳаяжон билан кузатди ва жамоаларни қўллаб-қувватлашди.
Дарвоқе, мусобақа бугун янги таъмирдан чиқарилган спорт залда бўлиб ўтмоқда. Эндиликда мазкур залда талабалар спортнинг волейбол, баскетбол, кураш мусобақалари ва дарс машғулотларини ўтказишлари мумкин.