Бугунги кунда мамлакатимизнинг барча ҳудудларида “Хотира ва қадрлаш куни” ҳамда Иккинчи жаҳон урушида қозонилган буюк Ғалабанинг 80 йиллиги муносабати билан туркум тадбирлар ташкил этилмоқда.
Мамлакатимиз Президенти Шавкат Мирзиёевнинг Ўзбекистон халқига йўллаган байрам табригини ҳам юртдошларимиз кўтаринки кайфият билан кутиб олди. Ушбу байрам табригида инсониятни фашизм балосидан халос этишга муносиб ҳисса қўшган аждодларимизнинг мислсиз қаҳрамонлиги, бу борада илмий жамоатчилик томонидан тақдим этилган янги тарихий маълумотлар, бугунги тинч ва фаровон ҳаётни қадрига етиш бугунги кундаги энг муҳим вазифа эканлиги баён этилди.
Табрикда Иккинчи жаҳон урушида мисли кўрилмаган матонат кўрсатган аждодларимиз билан бирга мустақиллик йилларида Ватанимиз озодлиги, халқимиз осойишталигини ҳимоя қилиш йўлида қаҳрамонларча ҳалок бўлган жасур ҳарбийларимиз хотирасига ҳурмат бажо келтириш барчамиз учун ҳам қарз, ҳам фарз эканлиги алоҳида таъкидланди.
Айниқса, сўнгги йилларда илмий изланишлар натижасида Иккинчи жаҳон уруши тарихининг янги саҳифаларинитақдим этилаётгани юртдошларимизни, ёш авлодни тарихий ҳақиқат билан яна бир бор танишиш имконини берди.Фашизмга қарши қонли жангларда ўша пайтда 6 миллион 800 минг нафарни ташкил этган аҳолининг қарийб 2 миллион нафари иштирок этгани, шундан 540 мингга яқини ҳалок бўлгани, 158 минг нафари бедарак йўқолгани, 50 мингдан ортиғи концлагерларда мислсиз қийноқ ва азоблар туфайли ҳалок бўлгани, 60 мингдан зиёди ногирон бўлиб қайтгани том маънода аждодларимизнинг қаҳрамонлигини кўрсатиб берди.
Ушбу тарихий жангларда юртимиз аскар ва офицерларидан 214 мингга яқини жанговар орден ва медаллар билан мукофотлангани, 301 нафари Совет Иттифоқи Қаҳрамони деган юксак унвонга, 70 нафардан зиёди учала даражадаги “Слава” орденига сазовор бўлганиюксак жасорат ва матонатнинг амалий эътирофи бўлди.
Уруш йилларида мамлакатимиз ўзининг бағрикенглиги, инсоний фазилатларини яна бир бор кўрсатиб берди. Жанг майдонларига жуда катта миқдорда ҳарбий техника, қурол-яроғ, дори-дармон, кийим-кечак, озиқ-овқат ва бошқа зарур маҳсулотлар етказиб берилгани, юртимизга 170 дан ортиқ завод ва фабрика кўчириб келтирилгани, қисқа муддатда 280 та янги корхона бунёд этилдгани, ўлкамизга олиб келинган 1 миллион 500 мингга яқин инсонни, жумладан, ота-онасидан жудо бўлган 250 минг нафар етим болани бағрига олиб, уларга меҳр-мурувват кўрсатгани бунинг ёрқин далилидир.
Президентимизнинг табригидан ўрин олган ушбу сатрлар ҳар қандай инсонда юртимизга, ота-боболаримизга ва тарихимизга бўлган чексиз ҳурмат ва эҳтиром туйғусини янада жўш уришига хизмат қилиши табиий.
Табрикда айни пайтда Иккинчи жаҳон урушида қатнашган аждодларимизнингҳаёти ва фаолияти, мардлик ва матонатини чуқур ўрганиш ва тарғиб этиш, ёш авлодни уларнинг шонли анъаналари руҳида тарбиялаш бўйича олиб борилаётган амалий ишлар, Тошкент шаҳрида бунёд этилган Ғалаба боғи, ҳудудлардаги “Ватанпарвар” боғларининг юртдошларимиз ва чет эллик меҳмонлар учун қутлуғ зиёратгоҳларга айлангани, шундай эзгу ишларнинг давоми сифатида Ғалаба боғи ҳудудида она юрт қалқонлари шарафига барпо этилган яна бир тарихий ёдгорлик – Миллат фидойилари мажмуасининг аҳамияти, уруш қатнашчиларига кўрсатилаётган тиббий ва ижтимоий хизматлар, мардларча ҳалок бўлган ҳарбийларнинг оила аъзоларига берилаётган ғамхўрлик алоҳида қайд этилди.
Табрик матнида бугунги мураккаб ва таҳликали замонда ёшларни баркамол инсонлар этиб тарбиялашда,юртимиздаги тинчлик ва барқарорликни, миллатлар ва динлараро аҳиллик ва тотувликни асраш йўлида қаҳрамон ота-боболаримизнинг Иккинчи жаҳон уруши йилларида кўрсатган сабот ва матонати барчамиз учун ҳамиша ибрат мактаби, куч ва илҳом манбаи бўлиб хизмат қилиши айтиб ўтилди. Бу эса аждодларимиз кўрсатган тарихий жасорат ва бугунги тинч ва осойишта кунларимизга шукроналик билан яшашимизда ҳал қилувчи омил бўлади.
Наримон Дехканов,
НамДУ профессори,
сиёсий фанлар доктори,
Халқ депутатлари вилоят кенгаши депутати